Mehnat  bozorida hech qiynalmasdan o‘z o‘rnini topadi

    Bugun, 24 fevral kuni Oltinsoy tumanidagi 8-IDUMda “Oltinsoy tumanidagi maktab o‘quvchilarini ikkita xorijiy til va bitta kasbga o‘rgatish”  mavzusida  o‘quv-amaliy seminari tashkil etildi.

Seminarda  Oltinsoy tumani hokimi o‘rinbosari Xayrulla Qosimov, Oltinsoy tuman xalq ta’limi bo‘limi mudiri Qahhor Obilov  hamda tumandagi maktablar direktorlari ishtirok etdi.

O‘quv-seminarga tashrif buyurgan ishtirokchilar  dastlab o‘quv maskanida  tikuvchilik kasb sirlarini o‘rganayotgan o‘quvchi qizlar faoliyati  hamda kasbiy ta’lim xonalari bilan  yaqindan tanishdilar. 

    Shuningdek, seminar qatnashchilari maktabda  xorijiy til fan o‘qituvchisi  Nargiza Muratshinaning  dars taqdimotlari, axborot texnologiyalari sohasida o‘z bilim va tajribalarini oshirayotgan  . yosh dasturchilar hamda maktab  bog‘ida ko‘chatchilik bilan shug‘ullanayotgan o‘quvchilar tomonidan yetishtirilayotgan ko‘chatlar va endigina ekilgan tok, anor qalamchalari parvarishi  haqidagi ma’lumotlarga ega bo‘lishdi.

—Maktabimiz hovlisida sartaroshxona  ham qurdik,—deydi 8-IDUM direktori  Hasan Qurbonov.—Shu kasbga qiziquvchi yoshlarni tanlab olib, ularni sartaroshlikka tayyorlayapmiz. O‘quvchilar qisqa muddatda o‘zlarining mijozlarini ham topishdi.   Yosh dasturchilarimizga esa  kompyuter xonasini kompyuter jamlanmalari bilan maktabimizni bitirib ketgan sobiq o‘quvchimiz   to‘liq  jihozlab berdi. Mana bugun zamonaviy kompyuterlarda  ishlayotgan

Tadbir davomida  Oltinsoy tumani hokimi o‘rinbosari Xayrulla Qosimovning   tumandagi umumta’lim maktablarida kelajakda tashkil etiladigan zamonaviy kasblar  hamda xorijiy tillarning o‘qitilishi yuzasidan ma’ruzasi tinglandi.

— Prezidentimizning o‘quvchi-yoshlarga umumta’lim maktablarida tuman va mahallalarning ixtisoslashuvidan kelib chiqib 64 ta kasb-hunarni o‘rgatishni yo‘lga qo‘yish tashabbusi har bir ota-onaning orzu-niyati ro‘yobi yo‘lida muhim qadam bo‘ldi, —dedi tuman hokimi o‘rinbosari Xayrulla Qosimov seminarda.— Davlatimiz rahbari umumta’lim maktablari bitiruvchilarining 50 foizi mehnat bozoriga biror-bir kasbni egallamasdan kirib kelayotganligini, ularga kasb o‘rgatilsa, bu bir qator ijtimoiy muammolarga yechim bo‘lishini ta’kidladi. Shunday ekan, har bir maktab jamoasi o‘quvchining qaysidir kasbga  bo‘lgan qiziqishidan kelib chiqib, o‘sha kasb ustalari bilan kelishgan holda ularni  jalb qilib,o‘quvchilarni mehnat bozoriga kasb-hunarli qilib kuzatishlari lozim. Tumanimizda  bog‘dorchilikka, dehqonchilik qilishga qiziqadaigan o‘quvchilar ko‘pchilik. Ularga  kasb sirlarini o‘rgatishga   davlatimiz rahbari tomonidan berilayotgan topshiriq sifatida  mas’uliyat bilan yondoshish talab etiladi, dedi X.Qosimov.

Maktab direktorlari tomonidan berilgan savollarga X.Qosimov  hamda Q.Obilovlar  javob berishdi.

Seminarda  maktablar direktorlariga  har haftaning shanba kunida sektorlar kesimida maktablarda  mana shunday seminarlar tashkil etish va maktab o‘quvchisini  maktabni bitirguncha bitta kasb egasi va ikki tilni mukammal biladigan  holatda mustaqil hayotga yo‘naltirish vazifasi topshirildi.

 Normurod TEMIROV,

Odiljon SODIQOV.